सोलापूर – जागतिक पर्यावरण दिनाचे औचित्य साधून बालाजी अमाईन्स लिमिटेड व हॉटेल बालाजी सरोवर प्रीमियर यांच्या वतीने विविध ठिकाणी वृक्षारोपण कार्यक्रम उत्साहात पार पडला.
बालाजी अमाईन्सचे व्यवस्थापकीय संचालक डी. राम रेड्डी यांच्या मार्गदर्शनाखाली आयोजित करण्यात आलेल्या या उपक्रमाचा शुभारंभ बालाजी सरोवर हॉटेल रोड येथे करण्यात आला. यावेळी फेडरल बँक, मुंबईचे अधिकारी प्रदीप के., जिग्मेशन चेरियन, जय त्रिवेदी व विक्रम स्वरूप यांच्या हस्ते वृक्षारोपण करण्यात आले.
पर्यावरण संवर्धनाच्या उद्देशाने राबविण्यात आलेल्या या उपक्रमांतर्गत बालाजी अमाईन्सच्या चिंचोली एमआयडीसी येथील युनिट क्रमांक ३ व ४ तसेच तामलवाडी येथील युनिट क्रमांक १ येथेही वृक्षारोपण करण्यात आले.
यावेळी लावण्यात आलेल्या रोपांचे संगोपन व संवर्धन करण्याची जबाबदारी सर्वांनी स्वीकारली. मार्गदर्शन करताना डी. राम रेड्डी यांनी पर्यावरण संरक्षण ही काळाची गरज असल्याचे सांगून प्रत्येकाने किमान एक वृक्ष लावून त्याचे संगोपन करावे, तसेच हरित पर्यावरणासाठी लोकसहभाग वाढविण्याची आवश्यकता असल्याचे प्रतिपादन केले.
या कार्यक्रमास बालाजी अमाईन्स व हॉटेल बालाजी सरोवर प्रीमियरचे अधिकारी, कर्मचारी तसेच फेडरल बँकेचे प्रतिनिधी मोठ्या संख्येने उपस्थित होते.
