#वयाच्या ७२ व्या वर्षी घेतला अखेरचा श्वास; दिल्लीतील एम्स रुग्णालयात हृदयविकाराच्या तीव्र झटक्याने निधन, हिंगोली जिल्ह्यावर शोककळा**
हिंगोली : धनगर समाजाचे ज्येष्ठ नेते आणि भाजपचे राज्यसभा खासदार रामराव सखाराम वडकुते यांचे रविवार, २२ नोव्हेंबर रोजी वयाच्या ७२ व्या वर्षी निधन झाले. दिल्लीतील अखिल भारतीय आयुर्विज्ञान संस्थेत (एम्स) उपचार सुरू असताना हृदयविकाराच्या तीव्र झटक्याने त्यांची प्राणज्योत मालवली. त्यांच्या निधनाने धनगर समाजासह महाराष्ट्राच्या सामाजिक आणि राजकीय क्षेत्रात मोठी पोकळी निर्माण झाली आहे.
#मिळालेल्या माहितीनुसार, चालताना त्रास होण्यासह छातीत वेदना जाणवू लागल्याने त्यांना दिल्लीतील एम्स रुग्णालयात दाखल करण्यात आले होते. उपचार सुरू असतानाच मध्यरात्री त्यांना हृदयविकाराचा तीव्र झटका आला आणि त्यातच त्यांची प्राणज्योत मालवली. त्यांचे पार्थिव मूळ गावी नेण्यात येणार असून, मंगळवारी हिंगोली जिल्ह्यात अंत्यसंस्कार करण्यात येणार आहेत.
#रामराव वडकुते यांनी आपल्या राजकीय कारकिर्दीत विविध महत्त्वाच्या पदांवर काम केले. २००४ ते २०१९ या कालावधीत ते राष्ट्रवादी काँग्रेसच्या माध्यमातून महाराष्ट्र विधान परिषदेचे सदस्य होते. पुण्यश्लोक अहिल्यादेवी होळकर महाराष्ट्र मेंढी व शेळी विकास महामंडळाचे अध्यक्ष म्हणूनही त्यांनी जबाबदारी सांभाळली होती.
#ऑक्टोबर २०१९ मध्ये त्यांनी भाजपमध्ये प्रवेश केला. त्यानंतर हिंगोली जिल्हाध्यक्षपदाची जबाबदारीही त्यांनी पार पाडली. मार्च २०२६ मध्ये भाजपने त्यांची महाराष्ट्रातून राज्यसभेवर निवड केली. एप्रिल २०२६ मध्ये त्यांनी खासदारकीची शपथ घेतली होती. नानाजी देशमुख यांच्यानंतर हिंगोली जिल्ह्यातून राज्यसभेवर जाणारे भाजपचे ते पहिले नेते ठरले होते.
#धनगर आणि ओबीसी समाजाच्या प्रश्नांवर त्यांनी सातत्याने आवाज उठवला. विशेषतः धनगर समाजाच्या अनुसूचित जमाती (एसटी) आरक्षणाच्या मागणीसाठी त्यांनी आक्रमक भूमिका घेत पाठपुरावा केला होता. समाजाच्या प्रश्नांना राजकीय व्यासपीठावर मांडणारा एक अनुभवी नेता म्हणून त्यांची ओळख होती.
#रामराव वडकुते यांच्या निधनाची बातमी समजताच हिंगोली जिल्ह्यासह संपूर्ण मराठवाड्यात शोककळा पसरली असून, राजकीय आणि सामाजिक क्षेत्रातून हळहळ व्यक्त केली जात आहे.






