पंढरपुरात गोळीबार करून राजाभाऊ भिंगे यांची हत्या; मोटारसायकलवरून आलेल्या हल्लेखोरांचा बेछूट गोळीबार
राहत्या घरातून बाहेर पडताच साधला निशाणा; नगरसेवक नामदेव भोईटे हत्या प्रकरणात भिंगे यांच्यावर होता आरोप
पंढरपूर : कार्तिक वारीच्या पार्श्वभूमीवर पंढरपूर शहरात गोळीबाराची गंभीर घटना घडली आहे. शिवा संघटनेचे सोलापूर जिल्हाध्यक्ष राजाभाऊ भिंगे यांच्यावर अज्ञात हल्लेखोरांनी गोळीबार करून त्यांची हत्या केली. मंगळवारी रात्री सुमारे नऊच्या सुमारास इसबावी येथील त्यांच्या राहत्या घराजवळ हा प्रकार घडला.
मिळालेल्या माहितीनुसार, राजाभाऊ भिंगे हे राहत्या घरातून बाहेर पडत असताना मोटारसायकलवरून आलेल्या अज्ञात हल्लेखोरांनी त्यांच्यावर बेछूट गोळीबार केला. या हल्ल्यात ते गंभीर जखमी झाले. त्यांना तातडीने लाईफलाइन हॉस्पिटलमध्ये दाखल करण्यात आले. मात्र, उपचारापूर्वीच त्यांचे निधन झाल्याची माहिती समोर आली आहे.
दरम्यान, नगरसेवक नामदेव भोईटे यांच्या हत्या प्रकरणात राजाभाऊ भिंगे यांच्यावर आरोप होता. या प्रकरणात ते सात ते आठ वर्षे कारागृहात होते. वर्षभरापूर्वी त्यांची कारागृहातून सुटका झाली होती. त्यानंतर त्यांनी शिवा संघटनेच्या माध्यमातून काम सुरू केले होते.
गोळीबाराच्या घटनेनंतर पोलीस अधिकारी घटनास्थळी दाखल झाले असून, हल्लेखोरांचा शोध सुरू आहे. परिसरातील सीसीटीव्ही फुटेज तपासून पोलिसांकडून तपासाची चक्रे वेगाने फिरवली जात आहेत.
कार्तिक वारीच्या तोंडावर घडलेल्या या गोळीबाराच्या घटनेने पंढरपूर शहरात मोठी खळबळ उडाली आहे.






